თელავის მუნიციპალიტეტსა და იაპონიის ქალაქ უშიკუს შორის გაფორმდება ურთიერთთანამშრომლობის მემორანდუმი.
იაპონიის ქალაქ უშიკუში პარლამენტის წევრ, ირაკლი ქადაგიშვილთან და კახეთის მხარეში სახელმწიფო რწმუნებულ გიორგი ალადაშვილთან ერთად, ოფიციალური ვიზიტით იმყოფება თელავის მუნიციპალიტეტის მერი ლევან ანდრიაშვილი.
თელავის მუნიციპალიტეტის მერიის ინფორმაციით, ვიზიტის ფარგლებში შეხვედრა გაიმართა ქალაქ უშიკუს მერთან და ადგილობრივი ხელისუფლების წარმომადგენლებთან.
ქართულმა და იაპონურმა მხარეებმა იმსჯელეს ორ ქალაქს შორის სამომავლო თანამშრომლობასა და მემორანდუმის გაფორმების შესახებ.
აღსანიშნავია, რომ დელეგაცია სტუმრად იმყოფებოდა ადგილობრივი ძიუდოს კლუბში, უშიკუს უძველესი ისტორიის მქონე ღვინის საწარმოსა და შატოში.
შეხვედრა შედგა იაპონიის ქალაქ უშიკუს საერთაშორისო გაცვლითი პროგრამების ასოციაციის ხელმძღვანელებთან, რა დროსაც მხარეებმა იმსჯელეს საერთო პროექტების დაგეგმვასა და განხორციელებაზე.
იაპონიაში ოფიციალური ვიზიტის დროს შეხვედრა გაიმართა იაპონიაში საქართველოს საელჩოში, საქართველოს საგანგებო და სრულუფლებიან ელჩთან იაპონიაში, თეიმურაზ ლეჟავასთან.
თელავისა და უშიკუს დამეგობრების შედეგად, ორ ქალაქ შორის ურთიერთთანამშრომლობის მემორანდუმი მოიცავს ეკონომიკურ, სოციალურ, კულტურულ, საგანმანათლებლო და სახელოვნებო სფეროებს.
იაპონიის ქალაქ უშიკუს ოფიციალური დელეგაცია თელავის მუნიციპალიტეტს მიმდინარე წელს ეწვევა.