თელავის მუნიციპალიტეტსა და იაპონიის ქალაქ უშიკუს შორის ოფიციალურად გაფორმდება თანამშრომლობის მემორანდუმი.
კახეთის მხარეში სახელმწიფო რწმუნებულის ადმინსტრაციის ინფორმაციით, იაპონიის ქალაქ უშიკუში ოფიციალური ვიზიტით იმყოფებიან ქართული დელეგაციის წევრები – კახეთის მხარეში სახელმწიფო რწმუნებული გიორგი ალადაშვილი, საქართველოს პარლამენტის წევრი ირაკლი ქადაგიშვილი და თელავის მუნიციპალიტეტის მერი ლევან ანდრიაშვილი.
ვიზიტის ფარგლებში დელეგაციის წევრებმა შეხვედრები გამართეს ადგილობრივ მერიაში და ესტუმრნენ იაპონური ძიუდოს კლუბსა და შატოს, რომელსაც ღვინის წარმოების 100 წლოვანი ისტორია აქვს.
თელავსა და უშიკუს შორის ურთიერთთანამშრომლობის მემორანდუმი მოიცავს სოციალურ – ეკონომიკურ, კულტურულ, საგანმანათლებლო, სახელოვნებო მიმართულებებს.
მემორანდუმის ხელმოწერის ოფიციალური ცერემონია გაიმართება იაპონური დელეგაციის თელავში ვიზიტის დროს.