დღეს, თელავის ისტორიულ მუზეუმში გაიხსნა თელავის ელენე ახვლედიანის სახელობის სამხატვრო სკოლის დამაარსებლისა და თელავის საპატიო მოქალაქის, სერგო ასლანიშვილის დაბადების დღისადმი მიძღვნილი გამოფენა.
შეკრებილ საზოგადოებას სიტყვით მიმართა თელავის მუნიციპალიტეტის მერის მოადგილემ ფიქრია ყუშიტაშვილმა, რომელმაც ხაზი გაუსვა სერგო ასლანიშვილის როლს თელავის სახელოვნებო ცხოვრებისა და კულტურის განვითარებაში.
გამოფენის გახსნას ადგილობრივი ხელისუფლების წარმომადგენლებთან ერთად ესწრებოდნენ სერგო ასლანიშვილის ოჯახის წევრები, მისი მოსწავლეები და ელენე ახვლედიანის სახელობის სამხატვრო სკოლის მოსწავლეები.
შეგახსენებთ, რომ სერგო ასლანიშვილმა სამხატვრო სკოლა დააარსა 1962 წელს, რომლის დირექტორიც თავად იყო 2006 წლამდე. რაც შეეხება თელავის საპატიო მოქალაქის სტატუსს, სერგო ასლანიშვილს მიენიჭა 2009 წელს.
თელავის მუნიციპალიტეტის მერიის ინფორმაციით, სერგო ასლანიშვილის ნამუშევრები თელავის ისტორიული მუზეუმის დროებით საგამოფენო სივრცეში გამოფენილი იქნება 2 კვირის განმავლობაში.