დღეს, თელავის მუნიციპალიტეტის სოფელ იყალთოში გაიხსნა რეაბილიტირებული ბიბლიოთეკა.
იყალთოს რეაბილიტირებული ბიბლიოთეკის გახსნას თელავის მუნიციპალიტეტის მერი ლევან ანდრიაშვილი, ადგილობრივი ხელისუფლების წარმომადგენლებთან ერთად დაესწრო, შეკრებილ საზოგადოებას განახლებული სივრცის გახსნა მოულოცა და ისაუბრა სოფლად ბიბლიოთეკის არსებობის მნიშვნელობაზე.
თელავის მუნიციპალიტეტის მერიის ინფორმაციით, განახლებულ სივრცეში მკითხველს, სკოლის მოსწავლეებს, ადგილობრივებსა და ბიბლიოთეკის სხვა სტუმრებს დახვდებათ განახლებული წიგნის ფონდი, ტექნიკა, უფასო ინტერნეტი და შესაბამისი ინფრასტრუქტურა.
აღსანიშნავია, რომ განახლებულ ბიბლიოთეკაში მოეწყო კომფორტული სამუშაო სივრცეები. თელავის მუნიციპალიტეტის საბიბლიოთეკო გაერთიანების ერთ-ერთი მთავარ მიმართულებას წარმოადგენს სოფლებში არსებული ბიბლიოთეკების რეაბილიტაცია და სამკითხველო კუთხეების განახლება. ბიბლიოთეკის თანამედროვე ინფრასტრუქტურით აღჭურვის მიზანია, ახალგაზრდა თაობებში წიგნიერების პოპულარიზაციის ხელშეწყობა.
შეგახსენებთ, რომ თელავის მუნიციპალიტეტის მერიის მხარდაჭერითა და საბიბლიოთეკო გაერთიანების ორგანიზებით, სოფლებში არსებული ბიბლიოთეკების განახლების პროცესი წლის განმავლობაში გაგრძელდება.